"Даяр лицензия сатылат" деген жарыяларга ишенбеңиз – министрлик эскертти

Курулуш, архитектура жана турак жай-коммуналдык чарба министрлиги жарандарды жана курулуш компанияларын лицензияны ортомчулар аркылуу эмес, мыйзамдуу тартипте алууга чакырды. Министрлик социалдык тармактарда тараган "даяр лицензия сатылат" жана "лицензияны тез алып беребиз" деген жарыялардан этият болууга үндөдү.

Маалыматка ылайык, Кыргызстандын мыйзамдары боюнча курулуш лицензиясы сатылбайт жана башка адамга өткөрүлүп берилбейт. Ал лицензияны алган жеке же юридикалык жакка гана таандык.

Мыйзамсыз жол менен алынган же сатып алынган лицензиялар аныкталса, мыйзамга ылайык чара көрүлөт. Ошондой эле даяр лицензияны сатып алган адам анын мурдагы ээсинин карыздарын, салыктык милдеттенмелерин, соттук талаштарын жана башка укуктук тобокелдиктерин да өзүнө алышы мүмкүн.

Учурда лицензия алуу тартиби жөнөкөйлөштүрүлүп, толугу менен санариптештирилген. Арыздар license.minstroy.gov.kg электрондук платформасы аркылуу кабыл алынат. Бардык талаптар аткарылган учурда лицензия кыска мөөнөттө берилет.