Оштогу курулуш компаниясына 200 миң сом айып пул салынды

Ош шаарындагы көп кабаттуу турак жай комплексинде курулуш коопсуздугунун талаптары бузулганы аныкталып, курулуш иштерин жүргүзгөн компания 200 миң сом айыпка жыгылды.

Курулуш, архитектура жана турак жай-коммуналдык чарба министрлигине караштуу Мамлекеттик архитектура-курулуш контролдоо департаментинин Ош шаардык башкармалыгы Ишматов көчөсү 152/1 дарегинде курулуп жаткан 23 блоктон турган беш кабаттуу турак жай комплексин текшерди.

Текшерүүнүн жүрүшүндө курулуш-монтаждоо иштери техникалык ченемдерди жана коопсуздук талаптарын бузуу менен жүргүзүлүп жатканы аныкталган. Атап айтканда, курулуш аянты коргоочу тосмолор менен тосулган эмес, ал эми жумушчулар атайын кийимдер жана жеке коргонуу каражаттары менен камсыздалган эмес.

Аталган мыйзам бузуулар үчүн "Буссоль" ЖЧКсына 200 миң сом айып пул салынып, аныкталган кемчиликтер толук жоюлганга чейин курулуш-монтаждоо иштери убактылуу токтотулду.