Протездик-ортопедиялык мекемеге 27 видеокөзөмөл орнотулду

Эмгек, социалдык камсыздоо жана миграция министрлигине караштуу Республикалык протездик-ортопедиялык буюмдар мекемесинде өндүрүш процессинин ачык-айкындуулугун камсыздоо жана коррупциянын алдын алуу максатында видеокөзөмөл системасы күчөтүлдү.

Министрликтин маалыматына ылайык, мекеменин өндүрүштүк цехтерине, кампаларына, административдик бөлүгүнө жана аймагына жалпысынан 27 видеокөзөмөл камерасы орнотулган.

Бул система протездик-ортопедиялык буюмдарды даярдоо процессин көзөмөлдөөгө, материалдардын так эсебин жүргүзүүгө, мыйзамсыз аракеттердин алдын алууга жана ички эмгек тартибин чыңдоого мүмкүндүк берет.

Мындан тышкары, видеожазуулар бейтаптардын жана кызматкерлердин укуктарын коргоого, ошондой эле талаштуу жагдайларды объективдүү кароого жардам берет.

Министрлик белгилегендей, видеокөзөмөл системасы Кыргыз Республикасынын Санарип кодексинин талаптарына ылайык орнотулган.