Бакыт Төрөбаев Жалал-Абаддагы төрт ири курулуштун жүрүшүн текшерди
Президенттин атайын тапшырмалар боюнча атайын өкүлү Бакыт Төрөбаев Жалал-Абад облусуна болгон жумушчу сапарынын алкагында бир катар социалдык жана инфраструктуралык объектилердин курулуш иштеринин жүрүшүн текшерди. Бул тууралуу Өкмөттүн Басма сөз кызматынан билдиришти.
Сапардын жүрүшүндө ал Манас шаарчасында курулуп жаткан 400 окуучуга ылайыкталган "Акылман" президенттик лицейинин, 5200 орундуу көп функционалдуу спорт сарайынын, жаңы муниципалдык базардын жана узундугу 17 чакырымды түзгөн Мундуз–Кыз-Көл унаа жолунун курулуш аянтчаларында болду.
Маалыматка ылайык, "Акылман" президенттик лицейинин курулушу бекитилген графикке ылайык жүрүп жатат. Окуу комплексин 2026-жылдын жай айларында пайдаланууга берүү пландалууда. Лицейде заманбап окуу корпустары менен катар спорт залы, бассейн, окуучулар үчүн жатакана жана кызматкерлер үчүн турак жай каралган.
Ошондой эле Бакыт Төрөбаев 5200 орундуу көп функционалдуу спорт сарайынын курулушунун жүрүшү менен таанышып, курулуш иштеринин сапатына жана белгиленген мөөнөттөрдүн сакталышына өзгөчө көңүл бурууну тапшырды.
Мындан тышкары, жаңы муниципалдык базардын курулушу жана Мундуз–Кыз-Көл автожолундагы иштер каралды. Жооптуу жетекчилерге бардык объектилерде курулуш нормаларын жана долбоордук талаптарды так сактап, иштерди өз убагында жана сапаттуу бүтүрүү милдети коюлду.
