Бишкектеги Кара-Жыгач конушунда 750 орундуу мектеп курулууда

Бишкек шаарындагы Кара-Жыгач конушунда 750 орундуу жаңы мектептин курулушу жүрүп жатат. Бул тууралуу Курулуш, архитектура жана турак жай-коммуналдык чарба министрлиги билдирди.

Маалыматка ылайык, мектеп борбор калаада курулуп жаткан 20 жаңы билим берүү мекемесинин бири болуп саналат. Объекттин курулушу 2026-жылдын февраль айында башталган. Учурда үч кабаттуу имарат тургузулуп, чатырын жабуу иштери жүргүзүлүүдө.

Долбоор боюнча мектептин жалпы аянты 8 234 чарчы метрди түзөт. Анда заманбап окуу класстары, лабораториялар, китепкана, компьютердик кабинеттер, азык-түлүк сактоочу кампасы бар ашкана, жыйындар залы, эмгек кабинеттери жана бардык шарттары каралган спорт залы жайгашат.

Министрликтин маалыматына ылайык, курулуш-монтаждоо иштеринин сапаты жана ар бир этаптын аткарылышы тиешелүү департаменттер тарабынан туруктуу көзөмөлдөнүүдө.