Кара-Кулжада жайыт жерди мыйзамсыз бузган жаранга 68 миң сом доо коюлду
Кара-Кулжа районунда жайыт жерди мыйзамсыз пайдалануу фактысы аныкталып, мыйзам бузган жаранга айып пул салынып, келтирилген чыгым өндүрүлүүдө. Бул тууралуу Айыл чарба министрлигинен билдиришти.
Жерди жана сууну көзөмөлдөө боюнча кызматтын Ош шаары жана Ош облусу боюнча аймактык башкармалыгы тарабынан жүргүзүлгөн текшерүүнүн жүрүшүндө Кара-Кулжа районуна караштуу Кара-Гүз айыл аймагынын Кара-Жыгач айылында жайыт жер мыйзамсыз бузулгандыгы аныкталды.
Маалыматка ылайык, Кара-Жыгач айылынын Ы.А. аттуу тургуну өз алдынча болжол менен 300 чарчы метр жайыт жердин асылдуу катмарын сүрдүргөн.
Аталган факт боюнча Президенттин 2022-жылдын 8-апрелиндеги №109 Жарлыгынын алкагында мыйзамсыз жер пайдалануунун алдын алуу боюнча тиешелүү чаралар көрүлүп, протокол түзүлүп, жазма буйрук берилди.
Кыргыз Республикасынын Укук бузуулар жөнүндө кодексинин 239-беренесине ылайык, жерди пайдалануу эрежелерин бузгандыгы үчүн жаранга 3 миң сом өлчөмүндө административдик айып пул салынды.
Мындан тышкары, жайыт жердин асылдуу катмарына келтирилген зыян үчүн 68 миң 400 сом өлчөмүндө доо эсептелди.
Учурда бузулган жайыт жерди баштапкы абалына келтирүү милдети жерди мыйзамсыз пайдаланган жаранга жана тиешелүү айыл өкмөтүнө жүктөлгөн.
