Кыргызстан менен Катар социалдык долбоорлор боюнча кызматташууну күчөтөт
Күн мурун курулуш, архитектура жана турак жай-коммуналдык чарба министринин биринчи орун басары Болот Чолпонбаев Кыргызстандагы Катар кайрымдуулук уюмунун филиалынын директору Абдельгадир Алимам Альбашеир Мохамед жетектеген делегация менен жолугушту.
Министрликтин маалыматына ылайык, жолугушууда социалдык инфраструктура тармагындагы кызматташтыкты кеңейтүү, тажрыйба алмашуу жана аймактарда социалдык багыттагы долбоорлорду ишке ашыруу мүмкүнчүлүктөрү талкууланды.
Ошондой эле Нарын облусунун Ак-Талаа районунда пландалып жаткан социалдык долбоорлор боюнча конкреттүү сунуштар каралды.
Жолугушуунун жыйынтыгында тараптар кызматташуу жөнүндө меморандумга кол коюшту.
Белгиленгендей, документ эки тараптуу кызматташтыкты бекемдөөгө, социалдык инфраструктураны өнүктүрүүгө жана калктын жашоо сапатын жакшыртууга багытталган биргелешкен долбоорлорду ишке ашырууга негиз түзөт.
