Кыргызстанда 24 товардык топ үчүн утилизациялык төлөм милдеттүү
2025-жылдын 1-январынан тартып Кыргызстанда Өндүрүүчүлөрдүн кеңейтилген жоопкерчилиги (ӨКЖ) системасынын алкагында утилизациялык төлөмдү төлөө милдети күчүндө экенин Жаратылыш ресурстары, экология жана техникалык көзөмөл министрлиги эскертти.
Министрликтин маалыматына ылайык, ӨКЖ — өндүрүүчүлөр менен импорттоочуларды товарлар жана алардын таңгактары колдонулгандан кийин кайра иштетүүгө жооптуу кылган мамлекеттик механизм.
Министрлер Кабинетинин 2024-жылдын 19-июнундагы №322 токтому менен ӨКЖ системасына кирген 24 товардык топтун тизмеси бекитилген. Алардын катарына аккумуляторлор, автошиналар, майлоочу майлар, пластик жана картон таңгактар, тиричилик техникалары жана башка товарлар кирет.
ӨКЖ боюнча:
- импорттоочулар товар өлкөгө киргизилгенден кийин 15 күндүн ичинде утилизациялык төлөмдү төлөшү керек;
- өндүрүүчүлөр төлөмдү ар квартал сайын, отчеттук мезгилден кийинки айдын 15-күнүнө чейинжүргүзүүгө милдеттүү.
ӨКЖ системасын ишке ашыруу Жаратылыш ресурстары министрлигине караштуу "Эко Оператор" мамлекеттик ишканасына жүктөлгөн.
Белгиленгендей, утилизациялык төлөмдөн түшкөн каражаттар таштандыларды кайра иштетүү инфраструктурасын өнүктүрүүгө жана экологиялык таза технологияларды киргизүүгө багытталат.
Министрлик утилизациялык төлөмдү өз убагында төлөбөгөндөр мыйзамга ылайык административдик жоопкерчиликке тартыларын эскертти.
