Манаста 1,5 млрд сомго “Акылман” Президенттик мектеп-лицейи курулууда
Манас шаарында жалпы баасы 1,5 млрд сомдон ашкан “Акылман” Президенттик мектеп-лицейинин курулушу жүрүп жатат. Долбоор Президент Садыр Жапаровдун тапшырмасына ылайык, Курулуш, архитектура жана турак жай-коммуналдык чарба министрлиги тарабынан ишке ашырылууда.
Мектеп-лицей 2,4 гектар аянтка курулуп, анын курамына 360 окуучуга ылайыкталган үч кабаттуу окуу корпусу, 410 орундуу жатакана жана мугалимдер үчүн 25 батирлүү беш кабаттуу турак жай кирет.
Долбоор боюнча окуу корпусунда заманбап окуу кабинеттеринен тышкары узундугу 25 метр болгон бассейн жана спорт залы болот.
Ошондой эле эл аралык талаптарга жооп берген стадион, жеңил атлетика үчүн чуркоо жолу курулуп, аймакты жашылдандыруу жана көрктөндүрүү иштери жүргүзүлөт.
Курулуш-монтаждоо иштерин "Кыргызкурулуш" мамлекеттик ишканасы аткарууда.
