Нарында заманбап агрохимиялык лаборатория ишке кирет
Нарын облусунда топурактын сапатын аныктоочу заманбап лаборатория 2026-жылдын 1-октябрынан тартып ишке кирет. Бул тууралуу суу ресурстары, айыл чарба жана кайра иштетүү өнөр жайы министринин биринчи орун басары Илич Марсбек уулу билдирди.
Президенттин Нарын облусундагы өкүлчүлүгүнүн маалыматына ылайык, Илич Марсбек уулу облус башчысы Нурбек Сатаров менен биргеликте Өсүмдүктөрдү химиялаштыруу, коргоо жана карантин департаментинин имаратында жүрүп жаткан оңдоо жана даярдык иштеринин жүрүшү менен таанышты.
Министрдин биринчи орун басары белгилегендей, лаборатория ишке берилгенден кийин дыйкандар топурактын курамын, азыктык элементтеринин деңгээлин жана асылдуулугун так аныктап, жер семирткичтерди илимий негизде колдонууга мүмкүнчүлүк алышат. Бул айыл чарбадагы түшүмдүүлүктү жогорулатууга жардам берет.
Учурда Нарын облусунун дыйкандары топурак боюнча лабораториялык корутунду алуу үчүн Бишкек шаарына кайрылууга аргасыз болуп келишет. Жаңы лабораториянын ачылышы менен бул кызмат жеринде көрсөтүлүп, дыйкандардын убактысы менен чыгымы үнөмдөлөт.
