Ошто курулуп жаткан 9 кабаттуу үйдүн техникалык абалы текшерилди
Курулуш, архитектура жана турак жай-коммуналдык чарба министрлигине караштуу Жер титирөөгө туруктуу курулуш жана инженердик долбоорлоо мамлекеттик институтунун Түштүк башкармалыгы Ош шаарындагы курулуп жаткан 9 кабаттуу турак жайга инженердик-техникалык текшерүү жүргүздү.
Министрликтин маалыматына ылайык, текшерүү Ош шаарынын Спортивная көчөсү 5/1 дарегинде жайгашкан турак жайда өткөрүлгөн. Ага курулушту жүргүзүп жаткан "СК Илбирс" ЖЧКсынын кайрылуусу негиз болуп, имараттын үстүнө жеңил конструкциялардан террасасы бар пентхаус куруу мүмкүнчүлүгү бааланды.
Текшерүүнүн жүрүшүндө адистер имараттын техникалык абалын изилдеп, долбоордук документтерди мамлекеттик курулуш ченемдерине жана сейсмикалык коопсуздук талаптарына шайкештиги боюнча талдашты. Ошондой эле курулуш конструкцияларына тиешелүү инженердик өлчөөлөр жүргүзүлдү.
Текшерүүнүн жыйынтыгы менен Жер титирөөгө туруктуу курулуш жана инженердик долбоорлоо мамлекеттик институту курулуш конструкцияларынын техникалык абалы боюнча тиешелүү корутунду даярдайт.
