Бишкектеги көйгөйлүү курулуштар жеринен текшерилди
Бишкек шаарынын мэри Айбек Джунушалиев укук коргоо органдарынын жана тиешелүү мамлекеттик мекемелердин өкүлдөрү менен биргеликте курулушу аяктай элек көйгөйлүү объектилерди кыдырып, үлүштүк ээлери менен жолугушту.
Мэриянын маалыматына ылайык, көчмө жыйын Президенттин укук коргоо органдарынын ишмердүүлүгүн координациялоону күчөтүү боюнча тапшырмасынын алкагында өткөрүлдү. Ага Бишкек шаарынын прокурору Канат Насипов, УКМКнын, Бишкек ШИИББдин, "Кадастр" мамлекеттик мекемесинин, Бишкек шаарынын архитектуралык-курулуштук контролдоо башкармалыгынын жана башка мамлекеттик органдардын өкүлдөрү катышты.
Жолугушуунун жүрүшүндө Октябрь районундагы Токомбаев жана Молдокулов көчөлөрүндө жайгашкан курулуш объектилеринин үлүштүк ээлери менен жолугушуу өтүп, көйгөйлөр талкууланды. Ошондой эле жарандардын кайрылуулары угулуп, аларды чечүүнүн мүмкүн болгон жолдору каралды.
Көчмө жыйындын жыйынтыгында түзүлгөн кырдаалды жөнгө салуунун бир нече варианты иштелип чыкты. Тиешелүү жол-жоболор аяктап, зарыл чечимдер кабыл алынгандан кийин анын жыйынтыгы тууралуу коомчулукка кошумча маалымат берилери белгиленди.
Жыйындын соңунда Айбек Джунушалиев тиешелүү кызматтарга прокуратура, "Кадастр" мамлекеттик мекемеси жана Октябрь райондук администрациясы менен биргеликте көтөрүлгөн маселелердин чечилишин туруктуу көзөмөлгө алып, мыйзамдын чегинде бардык зарыл чараларды көрүүнү тапшырды.
