Мэр Бишкектеги ири курулуш объектилерин кыдырды
Бишкек шаарынын мэри Айбек Джунушалиев борбор калаада курулуп жаткан жана реконструкцияланып жаткан бир катар социалдык жана инфраструктуралык объектилерди кыдырып, курулуш иштеринин жүрүшү менен таанышты. Бул тууралуу мэриядан билдиришти.
Мэр алгач Ахунбаев жана Репин көчөлөрүнүн кесилишинде курулуп жаткан "Үмүт чырагы" адистештирилген бала бакчасына барды. Жалпы аянты 3467 чарчы метр болгон эки кабаттуу имарат 250 балага ылайыкталып, ден соолугунун мүмкүнчүлүгү чектелген балдар үчүн курулууда. Долбоордо окуу кабинеттеринен тышкары гимнастика залы, логопеддин кабинети жана контакттык зоопарк каралган. Мэр жаңы бала бакчанын маңдайына сквер курууну жана бошогон аймакка дагы бир социалдык объект куруу мүмкүнчүлүгүн кароону тапшырды.
Андан соң Айбек Джунушалиев жалпы аянты 35 миң чарчы метрге жакын, 900 автоунаага ылайыкталган 9 кабаттуу көп деңгээлдүү унаа токтотуучу жайдын курулушу менен таанышты. Ошондой эле жолду кеңейтүүгө тоскоолдук жараткан объекттерди демонтаждоо боюнча сунуштарды даярдоону тапшырды.
Мындан тышкары, мэр Жал-29 кичи районундагы (Эко-Сити) спорт комплексинин курулушун көрүп чыкты. Долбоордун алкагында футбол жана балдар аянтчалары, воркаут-зона, бастырма курулуп, аймак жашылдандырылат.
Иш сапардын жүрүшүндө шаар башчысы Миңжылкыев көчөсүнүн 1,35 чакырымдык тилкесин реконструкциялоо иштерин да текшерди. Бул жерде туурасы 8 метр болгон жол жана эки тараптуу тротуарлар курулуп жатат. Мэр бак-дарактарды сактоону камсыздоону жана Миңжылкыев көчөсү менен Чыңгыз Айтматов проспектисинин кесилишине жол чырак орнотуу маселесин иштеп чыгууну тапшырды.
Ошондой эле Айбек Джунушалиев "Көлмө" конушундагы футбол аянтчасын реконструкциялоо жана ага чектеш аймакты көрктөндүрүү иштеринин жүрүшү менен таанышты.
Көчмө жыйындын соңунда мэр подряддык уюмдарга жана жооптуу кызматтарга курулуш иштеринин сапатын камсыздап, темпин күчөтүүнү жана бардык объектилерди белгиленген мөөнөттө пайдаланууга берүүнү тапшырды.
