Бишкекте курулуштагы мыйзам бузуу үчүн 200 миң сом айып салынды
Курулуш, архитектура жана турак жай-коммуналдык чарба министрлигине караштуу Мамлекеттик архитектура-курулуш контролдоо департаменти Бишкек шаарынын Жусуп Мамай көчөсү, 4 дарегинде жайгашкан 20 кабаттуу турак жай комплексинин курулушунда текшерүү жүргүздү.
Министрликтин маалыматына ылайык, текшерүүнүн жүрүшүндө казылган жердин (котловандын) капталдарын бекемдөөчү тирөөч конструкцияларды орнотууда коопсуздук талаптары толук сакталбаганы аныкталган.
Ошондой эле котловандын капталы коңшу имараттан чыккан саркынды суулардын таасиринен нымдалып, урай баштаганы белгиленди. Окуядан жабыркагандар болгон эмес.
Учурда курулуш компаниясы ураган тилкени калыбына келтирүү, котловандын капталдарын кошумча бекемдөө жана тирөөч конструкцияларды кайра орнотуу иштерин жүргүзүүдө.
Аталган мыйзам бузууга байланыштуу курулуш иштерин жүргүзүп жаткан "Аст Билдинг" ЖЧКсына карата акт түзүлүп, Укук бузуулар жөнүндө кодекске ылайык 200 миң сом өлчөмүндө айып пул салынды. Ошондой эле мыйзам бузууларды жоюу боюнча милдеттүү көрсөтмө берилди.
