Чоң-Алай айыл өкмөтүнө 40 миң сом айып салынды

Жаратылыш ресурстары, экология жана техникалык көзөмөл министрлигинин Ош регионалдык башкармалыгынын Экологиялык жана техникалык көзөмөл кызматы тарабынан Чоң-Алай айыл өкмөтүндө 2026-жылга карата пландуу текшерүү жүргүзүлдү.

Ведомствонун маалыматына ылайык, текшерүүнүн жүрүшүндө Кызыл-Эшме тилкесинде белгиленбеген жерге ар кандай таштандылар төгүлгөнү аныкталды. Аталган мыйзам бузуу үчүн Укук бузуулар жөнүндө кодексине ылайык 17 миң сом өлчөмүндө административдик айып салынды.

Мындан тышкары, айыл өкмөтүнө тиешелүү кызматтык унаалардын атмосферага чыгарган зыяндуу газдары атайын жабдуунун жардамы менен текшерилди. Натыйжада бир кызматтык унаадан булгоочу газдын көлөмү белгиленген ченемден ашканы аныкталып, бул мыйзам бузуу үчүн дагы Укук бузуулар жөнүндө кодексине ылайык 23 миң сом өлчөмүндө административдик айып салынды.

Жыйынтыгында эки мыйзам бузуу боюнча жалпы 40 миң сом өлчөмүндө административдик айып пул салынды.