Өзүн прокуратуранын өкүлү катары тааныштырып, алдамчылык кылган аял аныкталды
Бишкекте өзүн прокуратуранын полковниги катары тааныштырып, алдамчылык менен алектенген аялдын мыйзамсыз аракеттерине бөгөт коюлду. Бул тууралуу ИИМнин басма сөз кызматынан кабарлашты.
Маалыматка ылайык, Бишкек шаарынын ИИББнын кызматкерлери тарабынан 1988-жылы туулган, буга чейин бир нече жолу кылмыш жоопкерчилигине тартылган Э.У. аттуу жаран алдамчылыкка шектелип кармалды.
Тергөө органдарынын маалыматына ылайык, аталган жаран арыз ээсинин ишенимине кирип, өзүн Кыргыз Республикасынын Башкы прокуратурасынын кызматкери катары тааныштырып, прокуратура органдарынын полковнигинин погондору тагылган формалык кийимди мыйзамсыз кийип жүргөн.
Шектүү - жабырлануучунун ишениминен кыянаттык менен пайдаланып, ар кандай шылтоолор менен акча каражаттарын алган. Ал арыз ээсине мейманкана бизнесин ачууга көмөк көрсөтүүнү, кызын Кембридж университетине киргизүүнү, Түркияга туристтик жолдомону арзандатылган баада сатып берүүнү, батир алууга жардам берүүнү, ошондой эле Кыргыз Республикасынын Башкы прокуратурасынын ишмердүүлүгүнө байланыштуу делген башка маселелерди чечип берүүнү убада кылган.
Күндүн негизги жаңылыктары — Telegram каналыбызда
Каналга катталуу
