Кантта мыйзам бузган муниципалдык ишканага айып салынды

Жаратылыш ресурстары, экология жана техникалык көзөмөл министрлигине караштуу Экологиялык жана техникалык көзөмөл кызматынын Чүй регионалдык башкармалыгынын инспекторлору Кант шаарындагы “Кант-Тазалык” муниципалдык ишканасында пландуу текшерүү жүргүзүштү.

Текшерүүнүн жыйынтыгында ишкананын автотранспорттору атмосфералык абаны коргоо жаатындагы мыйзам талаптарын бузганы аныкталып, Укук бузуулар жөнүндө кодексине ылайык протокол түзүлүп, 46 миң сом өлчөмүндө административдик айып салынды.

Мындан тышкары, Кант шаарынын тургундарынын кайрылуусунун негизинде Октябрь революциясынын 50 жылдыгы көчөсүндө ташталган таштандылар боюнча жеринде текшерүү жүргүзүлдү.

Текшерүүнүн жыйынтыгында Ысык-Ата районуна караштуу Кант шаардык мэриясынын “Кант-Тазалык” мекемесине Укук бузуулар жөнүндө кодексинин 115-беренесине ылайык дагы бир протокол түзүлүп, 17 миң сом өлчөмүндө административдик айып салынды.

Жыйынтыгында Кант шаардык мэриясынын "Кант-Тазалык" мекемеси тарабынан тазаланууда.