Манас шаарындагы №13 мектепке жаңы окуу корпусу салынып жатат

Курулуш, архитектура жана турак жай-коммуналдык чарба министрлиги тарабынан Манас шаарында алты жаңы мектептин курулушу жүрүп жатат. Алардын бири — №13 Роза Азимбаева атындагы мектепке кошумча салынып жаткан 528 орундуу жаңы окуу корпусу.

Министрликтин маалыматына ылайык, курулуш иштери 2026-жылдын март айында башталган. Учурда үч кабаттуу имараттын негизги конструкциялары бүткөрүлүп, чатырын жабуу жана ички шыбак иштерин жүргүзүү уланууда.

Жаңы окуу корпусу беш блоктон туруп, жалпы аянты 2 846 чарчы метрди түзөт. Анда окуу класстары, лабораториялар, китепкана, ашкана, дарыгердин бөлмөсү, жыйындар залы, эмгек класстары жана спорт залы каралган.

Курулуштун жүрүшү жана аткарылып жаткан иштердин сапаты Курулуш министрлигине караштуу тиешелүү департаменттер тарабынан туруктуу көзөмөлдөнүүдө.

Долбоор аяктагандан кийин жаңы окуу корпусу эки нөөмөттө 1 миңден ашуун окуучунун билим алуусуна мүмкүнчүлүк түзөт.