Ысык-Көлдө теплоход ээлерине 30 миң сом айып салынды

Жаратылыш ресурстары, экология жана техникалык көзөмөл министрлигине караштуу Экологиялык жана техникалык көзөмөл кызматынын инспекторлору Чолпон-Ата шаарында жана Бостери айылында атмосфералык абанын тазалыгын камсыздоо боюнча рейд жүргүзүштү.

Текшерүүнүн алкагында жалпысынан 14 теплоход текшерилип, атмосфералык абаны коргоо жаатындагы мыйзам талаптарын бузуу фактылары аныкталды.

Анын жыйынтыгында Укук бузуулар жөнүндө кодекске ылайык төрт жеке тарапка административдик протокол түзүлүп, ар бирине 7 миң 500 сомдон айып пул салынды. Жалпы айыптын суммасы 30 миң сомду түздү.

Экологиялык жана техникалык көзөмөл кызматы айлана-чөйрөнү коргоо, атмосфералык абанын тазалыгын сактоо жана экологиялык мыйзамдардын талаптарынын аткарылышын камсыздоо максатындагы рейддик иш-чаралар мындан ары да туруктуу негизде улантыларын билдирди.