Бишкек жана Ошто улгайган адамдар үчүн эс алуу борборлору курулат
Ысык-Көлдө пенсионерлер үчүн заманбап эс алуу борбору ачылат. Бул тууралуу Социалдык фонддун төрагасы Бактияр Алиев билдирди.
Алиевдин айтымына караганда, борбордо улгайган жарандар бийлеп, йога менен машыгып, шахмат ойной алышат. Ошондой эле эртең мененки дене тарбия көнүгүүлөрүн жасоого бардык шарттар түзүлөт.
Президенттин тапшырмасынын негизинде ушундай эле эс алуу борборлорун Бишкек жана Ош шаарларында да куруу пландалууда. Бул үчүн жер тилкелери буга чейин бөлүнүп берилген.
Алиев белгилегендей, бардык керектүү документтер даяр болгондон кийин курулуш келээрки жылдын жазында башталат. Алгач долбоор Ысык-Көлдө ишке ашырылып, андан соң Ошто жана башка аймактарда да курулат.
Каржылоо пенсиялык фонддон эмес, Өнүктүрүү фондунун каражаттарынын эсебинен жүргүзүлөт.
