Баткенде 8 жаңы билим берүү мекемеси ачылды
Баткен облусунда жаңы окуу жылынын башталышына карата 8 жаңы билим берүү мекемеси пайдаланууга берилди. Бул тууралуу президенттин Баткен облусундагы ыйгарым укуктуу өкүлүнүн басма сөз кызматы билдирди.
Баткен районунун Төрт-Гүл айыл аймагындагы Жаңы-Жер айылында жаңыдан пайдаланууга берилген 500 орундуу мектептин ачылыш аземине президенттин Баткен облусундагы ыйгарым укуктуу өкүлү Мамыржан Рахимов катышты. Ал мугалимдерди жана окуучуларды жаңы окуу жылы менен куттуктап, балдардын сапаттуу билим алуусуна шарт түзүү жана мугалимдердин эмгегин баалоо мамлекеттик саясаттын артыкчылыктуу багыттарынын бири экенин белгиледи.
Ошондой эле облус башчысы билим берүү тармагындагы иштер мындан ары да улантыларын айтып, жаңы мектептин жамаатына белектерин тапшырды жана бир катар мугалимдерди сыйлады.
Маалыматка ылайык, быйыл Баткен облусунда 15 миң 300 бала биринчи класска кабыл алынды. Учурда облустагы 236 мамлекеттик жана 22 жеке менчик билим берүү мекемесинде жалпы 131 миң 543 окуучу билим алууда. Аларга 8 миң 471 мугалим сабак берет.
Билим күнүн утурлай облуста жалпы 8 билим берүү мекемеси пайдаланууга берилди. Алар:
- Баткен районунун Төрт-Гүл айыл аймагындагы Жаңы-Жер айылында 500 орундуу мектеп;
- Кадамжай районунун Майдан айыл аймагындагы Айырбаз айылында 500 орундуу "Кыргызстандын 10 жылдыгы" атындагы мектеп;
- Баткен шаарынын Аэропорт участкасында 225 орундуу мектеп;
- Баткен районунун Самаркандек айылындагы "Бала Нур" балдар бакчасынын кошумча имараты;
- Лейлек районунун Тайлан участкасындагы "Ак-Шоола" мектепке чейинки билим берүү мекемеси;
- Лейлек районунун Ак-Арык айылындагы 120 орундуу "Бүчүр" балдар бакчасы;
- Кадамжай шаарындагы "Ыйман" балдар бакчасы;
- Баткен районунун Үч-Дөбө айылындагы "Үч-Дөбө" балдар бакчасы.
