Бүгүн 147 миңге жакын бала мектеп босогосун аттады
Жаңы окуу жылында Кыргызстандагы мектептер 1,5 миллионго жакын окуучуга эшигин ачты. Алардын ичинен 147 миңге жакын бала мектеп босогосун алгачкы жолу аттады. Бул тууралуу Агартуу министрлиги билдирди.
Билдирүүгө караганда, бүгүнкү күндө өлкө боюнча жалпы билим берүү уюмдарында 97 миңге жакын мугалим эмгектенет. Республикада жалпы 2374 мектеп иштеп жатат. Анын 2132си мамлекеттик, 242си жеке менчик мектептер.
12 жылдык билим берүүгө этап-этабы менен өтүүнүн экинчи этабынын алкагында 1, 2, 3, 5, 7 жана 8-класстардын окуучулары жаңы билим берүү системасына өттү. Ал эми 4, 9, 10 жана 11-класстын окуучулары 11 жылдык мектептик билим берүү системасы боюнча окуусун улантат.
Ошондой эле өлкөдө 94 кесиптик лицей иш алып барууда. Жаңы окуу жылына карата кесиптик лицейлерге электрондук система аркылуу 17 миң 307 окуучу кабыл алынган.
Маалыматка ылайык, 11-сентябрда Талас облусунда президент Садыр Жапаровдун катышуусунда өлкө боюнча 100 социалдык объект пайдаланууга берилди. Алардын арасында 34 мектеп жана 28 бала бакча бар.
Мындан тышкары, жыл аягына чейин дагы 58 билим берүү объектисин пайдаланууга берүү пландалууда. Алардын 56сы жаңы курулуш болсо, анын 49у мектеп, жетөө бала бакча. Ошондой эле капиталдык оңдоп-түзөөдөн өткөн эки мектеп пайдаланууга берилет.
