Айрым аймактарда юридикалык өкүлдөрдүн талаптарын убактылуу жеңилдетүү сунушталууда
Юстиция министрлиги айрым административдик-аймактык бирдиктерде юридикалык өкүлдөргө коюлуучу квалификациялык талаптардан убактылуу өзгөчөлүктөрдү колдонуу тартибин киргизүүнү сунуштады. Тиешелүү буйруктун долбоору коомдук талкууга чыгарылды.
Долбоор калкка юридикалык жардам көрсөтүүнүн жеткиликтүүлүгүн жогорулатууга багытталган. Ага ылайык, айрым аймактарда адвокаттардын жана юридикалык өкүлдөрдүн жетишсиздиги, калктуу конуштардын алыстыгы, транспорттук жеткиликтүүлүктүн төмөндүгү жана башка объективдүү себептерден улам жарандардын квалификациялуу юридикалык жардам алуу мүмкүнчүлүгү чектелиши белгиленген.
Мындай жеңилдиктер бардык аймактарга автоматтык түрдө жайылтылбайт. Юстиция министрлиги алардын колдонулуучу административдик-аймактык бирдиктеринин атайын тизмесин түзүүнү сунуштоодо.
Долбоорго ылайык, аймактарды аныктоодо калктын саны жана жайгашуусу, иштеп жаткан адвокаттардын жана юридикалык өкүлдөрдүн саны, калктуу конуштардын алыстыгы, транспорттук жеткиликтүүлүк, соттук өкүлчүлүккө болгон реалдуу муктаждык сыяктуу көрсөткүчтөр эске алынат.
Мындан тышкары, соттордун, жергиликтүү өз алдынча башкаруу органдарынын, Юстиция министрлигинин аймактык бөлүмдөрүнүн, Кыргызстандын Адвокатурасынын жана Юридикалык жардам кызматынын маалыматтары да каралат.
Долбоордо бул өзгөчөлүктөр 2028-жылдын 31-декабрына чейин колдонулушу сунушталган. Бул мөөнөт ичинде механизмдин натыйжалуулугун баалап, зарыл болсо тиешелүү аймактардын тизмесин өзгөртүү мүмкүнчүлүгү каралган.
Ошол эле учурда алимент өндүрүү жана доонун баасы 10 миң сомдон ашпаган акча каражатын өндүрүү боюнча иштерде аймакка карабастан айрым өзгөчөлүктөрдү колдонуу сунушталууда.
Министрлик сунушталган механизм юридикалык өкүлдүн статусун алуунун жалпы тартибин өзгөртпөй турганын белгилейт. Өзгөчөлүктөр убактылуу жана аймактык чектөө менен гана колдонулат.
