Бажы кызматына иштөөнү каалагандар “Кыргызтесттен” өтүшү абзел
Бажы органдарында кызмат өтөөгө кирүү үчүн конкурска катышууга документтерди тапшырууда мамлекеттик тилди билүү деңгээлин тастыктаган “Кыргызтест” системасынын сертификаты талап кылынат. Бул тууралуу мекеменин басма сөз кызматынан кабарлашты.
Билдирүүгө караганда, КРнын “Мамлекеттик тили жөнүндө” конституциялык Мыйзамына ылайык, укук коргоо органдарынын кызматкерлери мамлекеттик тилди билүүгө жана аны кызматтык милдеттерин аткарууда колдонууга тийиш.
“Дагы бир маанилүү жагдай. 2026-жылдын 31-декабрына чейин В1 деңгээли талап кылынат, ал эми 2027-жылдын 1-январынан тартып — В2 деңгээли талап кылынат. Ошондуктан, бажы органдарында кызмат өтөөнү караштырып жаткан тараптар тестирлөөдөн өтүүнү эске алышы керек” – дейт билдирүүдө.
Ал эми конкурс өткөрүүнүн жана документтерди кабыл алуунун так мөөнөттөрү, зарыл болгон документтердин тизмеси, квалификациялык талаптар жана конкурстан өтүүнүн тартиби боюнча маалымат 2026-жылдын аягына чейин Мамлекеттик бажы кызматы тарабынан кошумча жарыяланат
Күндүн негизги жаңылыктары — Telegram каналыбызда
Каналга катталуу