Таласта «Манас Деми – 2026» кайрымдуулук жарышы өттү
Бүгүн, Талас облусундагы «Манас Ордо» комплексинде "Манас Деми – 2026" кайрымдуулук жарышы болуп өттү. Жарышка Кыргызстандын ар кайсы аймактарынан келген жөө күлүктөр, үй-бүлөлөр, күйөрмандар жана башка коноктор катышты.
Жарышка катышуучулар 21,1 км, 10 км жана 3 км аралыкта күч сынашты. Ден соолугунан мүмкүнчүлүгү чектелген адамдар үчүн жарыш 1 км аралыкка акысыз уюштурулду.
Мындан сырткары балдар үчүн өзүнчө “Манас Деми – Балакай” жарышы өтүп, марага жеткен балдарга медаль жана өнөктөштөрдүн белектери тапшырылды.
Жарыштан түшкөн каражат Талас облусундагы реабилитациялык борборлорго жана балдар үйлөрүнө жумшалат.
Иш-чара КР Президентинин Талас облусундагы ыйгарым укуктуу өкүлчүлүгүнүн демилгеси жана «Альянс Алтын» компаниясынын колдоосунун алдында уюштурулду.
