Кызыл китептеги жаныбарларды аткандар 2 млн сомго чейин айып пул төлөйт
Кыргызстанда мыйзамсыз аңчылык кылган жана сейрек кездешүүчү жапайы жаныбарларды аткандарга ири айыптар каралган. Бул тууралуу Жаратылыш ресурстары, экология жана техникалык көзөмөл министрлиги билдирди.
Маалыматка ылайык, министрликтин инспекторлору бул багытта ыкчам рейддерди үзгүлтүксүз жүргүзүп турат. Кызыл китепке кирген жаныбарларды аткандар үчүн айып пулдар:
• илбирс - 2 млн сом,
• аркар-кулжа, марал, күрөң аюу, жейрен - 1,5 млн сом,
• кызыл карышкыр, мадыл, сүлөөсүн - 50 миң сом,
• ортоазиялык кундуз, мензбир сууру - 20 миң сом.
Буга чейин Ош облусунун Кара-Кулжа районуна караштуу Алайкуу айыл аймагынын "Кашка-Суу" жайлоосунда 1 баш тоо текеси мыйзамсыз атылганы аныкталган.
Аталган факт боюнча протокол түзүлүп, укук бузуучуга 12 500 сом административдик айып пул салынып, жаратылышка келтирилген зыян үчүн 300 000 сом доо коюлган. Материалдар укук коргоо органдарына өткөрүлүп берилди.
