Жогорку Кеңеште майыптыгы бар адамдар үчүн жеткиликтүүлүк талкууланды
Бүгүн Жогорку Кеңеште майыптыгы бар адамдар үчүн парламенттин жеткиликтүүлүгүн комплекстүү баалоонун экинчи этабы өттү. Бул тууралуу Жогорку Кеңештин маалымат кызматы кабарлады.
Маалымдалгандай, жолугушууга "Ала-Тоо»" тобунун жетекчиси Талайбек Масабиров, депутаттар Гүлжан Сатиева, Чолпон Эсенаманова жана тиешелүү тараптар катышты.
Талкууда майыптыгы бар адамдардын парламент ишине катышуусу, депутаттар менен түз байланыш, имараттагы физикалык шарттар, маалыматтык жана санариптик ресурстарды пайдалануу маселелери каралды.
Баалоонун максаты - тоскоолдуктарды аныктап, аларды жоюунун жолдорун иштеп чыгуу.
Иш-чара 22-24-сентябрь күндөрү Жогорку Кеңеш, ЕККУнун Демократиялык институттар жана адам укуктары бюросу жана Парламентти өнүктүрүү борбору тарабынан, ЕККУнун Бишкектеги кеңсесинин колдоосу менен өтүп жатат.
Жыйынтыгында парламенттин жеткиликтүүлүгүн жакшыртуу боюнча сунуштамалар даярдалат.
