Бишкекте жылытуу системасын жаңыртууга 1 млн сомго чейин насыя берилет
Бишкек шаарынын мэриясы жылытуу мезгилине байланыштуу шаар тургундарына фракциясы 0–13 мм болгон майда көмүрдү ташып келүүгө, сатууга, сактоого жана пайдаланууга тыюу салынганын эскертти. Ошондой эле экологиялык жактан таза жылытуу системаларына өтүүнү каалагандар үчүн жеңилдетилген насыялар каралган.
Мэриянын маалыматына караганда, Министрлер кабинетинин 2025-жылдын 6-октябрындагы №639 токтомуна ылайык, Бишкек шаарынын жана Чүй облусунун аймагында майда көмүрдү колдонууга чектөө киргизилген. Токтом 2025-жылдын 22-октябрында күчүнө кирген. Бул талап жылуулук менен камсыздоочу ишканаларга көмүр жеткирүүгө жайылтылбайт.
Газдаштыруу үчүн 150 миң сомго чейин насыя
Бишкек шаарынын жана Чүй облусунун тургундары газдаштыруу программасынын алкагында төмөнкү шарттарда насыя ала алышат:
- Насыянын суммасы - 150 миң сомго чейин;
- Пайыздык чен - жылдык 3%;
- Мөөнөтү - 12 же 24 ай.
Экологиялык жылытуу системалары үчүн 1 млн сомго чейин
Мындан тышкары, "Абанын сапатын жакшыртуу" долбоорунун алкагында Бишкек шаарынын, Аламүдүн жана Сокулук райондорунун тургундары үчүн дагы бир насыялоо программасы иштейт.
Анын шарттары:
- Насыянын суммасы - 1 млн сомго чейин;
- Пайыздык чен - жылдык 6%дан баштап;
- Мөөнөтү - 60 айга чейин.
Долбоордун өнөктөш банктары - "Элдик Банк", "АБанк" жана "Бакай Банк". Насыя алуу шарттары жана арыз берүү тартиби боюнча жарандар аталган банктарга түз кайрыла алышат.
