Латвия Россия менен чектеш 280 чакырым жерине тосмо куруп бүттү
Латвия Россия менен болгон мамлекеттик чек арасында 280 чакырымдык тосмо курду. Техникалык шарттар мүмкүнчүлүк берген бардык тилкелерде тосмо үзгүлтүксүз орнотулганын 29-декабрда бул иштерге жооптуу болгон мамлекеттик Valsts Nekustamie Ipasumi (VNI) компаниясы билдирди.
Ички иштер министри Рихард Козловскис чек арада жогорку технологиялуу жабдууларды орнотуу иштери улантылып жатканын айтты.
"Биздин негизги максатыбыз — Европа биримдигинин чыгыш чек арасында заманбап чек ара коопсуздугун түзүү", — деди министр.
VNI компаниясында билдиришкендей, чек арага жакын инфраструктураны өнүктүрүү иштери да уланып жатат. Анын алкагында патрулдук жолдор, жөө адамдар үчүн көпүрөлөр жана башка инженердик курулмалар салынат.
Эске салсак, Балтика өлкөлөрү — Латвия, Литва жана Эстония — Россия менен болгон чек араларында тосмолорду куруп жатышат. Ошондой эле Финляндия да өз чек арасында тосмо куруп жатканы маалым.
Латвия 2024-жылдын июль айында Беларусь менен болгон чек арасында 145 чакырымдык тосмонун курулушун аяктаган.
