Пенсиялык топтоолорду кандай учурда пайдаланууга болот?
Кыргызстанда жарандар пенсиялык топтоо каражаттарын айрым социалдык маанилүү максаттарга пайдалануу мүмкүнчүлүгүнө ээ. Бул боюнча акыркы өзгөртүүлөр 2026-жылдын 24-апрелинен тартып күчүнө кирген.
Социалдык фонддун маалыматына ылайык, КРнын жарандарынын жашоо сапатын жакшыртуу жана социалдык бакубаттуулугун камсыз кылуу максатында пенсиялык топтоо каражаттарын төмөнкүдөй учурларда пайдалануу мүмкүндүгү каралган:
1. Пенсия курагына жеткен жарандарга төлөп берүү;
2. Чет өлкөдө туруктуу жашоо үчүн өлкөдөн чыкканда;
3. Мураскорлорго;
4. Аскер кызматкерлерине төлөө;
5. Ипотекалык насыялоого;
6. Жумушсуздукка;
7. Оор ооруларды дарылоого
Акыркы өзгөртүүлөргө ылайык, жарандар ипотекалык карызын төлөө үчүн же тизмеге кирген оор оорулар менен жабыркаган учурда пенсиялык топтомо каражаттарын көп жолу пайдалануу укугуна ээ болушат. Бул үчүн Социалдык фонддун аймактык башкармалыктарына тиешелүү документтер менен кайрылуу зарыл. Буга чейин бул каражатты мурда келишим түзүлгөн адам гана пайдалана алган болсо, эми анын мыйзамдуу жубайына да мындай укук берилет.
Мисалга: ипотекалык насыя алууда пенсиялык топтомону алуу шарты
1️) КРнын Социалдык фондунун аймактык башкармалыгынан жеке камсыздандыруу эсебинин топтоо бөлүгүнөн көчүрмө алыңыз.
2️) Банкка же курулуш компаниясына кайрылыңыз: алынган көчүрмөнү көрсөтүп, алардан тастыктоочу кат алыңыз (ипотекалык насыя жөнүндө).
3️) КР Социалдык фондунун аймактык башкармалыгына документтер топтомун тапшырыңыз.
Ипотека үчүн керектүү документтер: арыз ээсинин паспорту; нике күбөлүгү (жубайы кайрылган учурда); банктан, каржы-насыялык мекемеден ипотекалык келишим боюнча карыздын бар экендиги жөнүндө тастыктоочу кат.
Пенсиялык топтоо каражаттарын мөөнөтүнөн мурда пайдалануу үчүн топтоо эсебиндеги каражаттын көлөмү 50 миң сомдон жогору болушу керек.
Эске салсак, ар бир кызматкердин эмгек акысынын 10 % Социалдык фондго которулат. Анын 8 % пенсиялык фондго, ал эми 2 % мамлекеттик пенсиялык топтоо фондуна чегерилет.
