Бишкекте абанын сапатын көзөмөлдөгөн жаңы посттор орнотулду
Бишкекте атмосфералык абанын сапатын көзөмөлдөөчү жаңы байкоо посттору орнотулду. Бул иштер абанын сапатын мониторингдөө системасын жаңылоого багытталган. Кыргызгидрометтин маалыматына караганда, жаңы посттор 12-сентябрда Бишкек шаарында орнотулган.
Иштер Дүйнөлүк банк каржылаган “Кыргыз Республикасында абанын сапатын жакшыртуу” долбоорунун алкагында жүргүзүлүүдө. Жаңы жабдуулар абанын сапатын үзгүлтүксүз көзөмөлдөөгө, маалыматтарды чогултуу жана талдоо сапатын жакшыртууга мүмкүндүк берет.
Кыргызгидрометтин маалыматы боюнча, буга чейин колдонулуп келген абанын сапатын байкоочу посттор 1970-жылдардан бери иштеп келген. Узак убакыт пайдаланылгандыктан, аларды жаңылоо жана техникалык жактан модернизациялоо зарылдыгы жаралган.
Жаңы постторду орнотуу иштерин Кыргызгидрометтин адистери жабдууларды жеткирүүчү компаниянын жана өндүрүүчү заводдун адистери менен биргеликте жүргүзүштү. Жаңыланган байкоо тармагы абанын абалын баалоодо заманбап ыкмаларды колдонууга жана атмосфералык абанын сапаты боюнча маалыматтарды натыйжалуу көзөмөлдөөгө шарт түзөт.
Бул иштер Бишкектеги абанын сапатын көзөмөлдөө системасын модернизациялоонун маанилүү этаптарынын бири болуп саналат.
