Арашан – Чуңкурчак жолуна 400 метр бир тараптуу асфальт төшөлдү
Кечээ, 13-октябрда Транспорт жана коммуникациялар министри Абсаттар Сыргабаев Арашан – Чуңкурчак жолунун курулуш иштерин текшерип барды. Бул тууралуу министрликтин маалымат кызматынан билдиришти.
Учурда жолдун 3-22-чакырымдар аралыгында кеңейтүү жана жер жумуштары жүрүп жатат. Мындан тышкары, 46 суу өткөрүүчү түтүктөрдү орнотуу, 2 көпүрөнү реконструкциялоо иштери уланууда.
9+600-чакырымында 400 метр бир тараптуу асфальт төшөлдү. Башка тилкелерде жолдун негизи катмары жасалып, асфальт төшөө иштерине даярдыктар жүрүп жатат.
Министр ошондой эле, аталган жолдун 2-чакырымында жайгашкан асфальт-бетон заводдун ишмердүүлүгү менен да таанышты. Завод саатына 160 тонна материал чыгарууда. Сыргабаев жеринде тиешелүү жетекчилер менен жолугушуп, иш ыргагын ыкчамдатуу тапшырмасын койду.
Жол салуу иштери мамлекеттик капиталдык салымдар беренесинин эсебинен каржыланууда.
Арашан–Чуңкурчак жолу туристтик мааниге ээ болгон негизги каттамдардын бири. Аталган жол тоо-лыжа базага жана аймактагы эс алуу жайларга алып барат. Жолдун курулушу жарандарга ыңгайлуу шарт түзүп, айдоочулардын коопсуз кыймылын камсыз кылат.
Белгилей кетсек, министрлик тарабынан өлкө аймагындагы туристтик объектилерге барган жолдордун абалын жакшыртууга өзгөчө көңүл бурулууда.
