Айып пулдарды төлөтүү үчүн жаңы тартиптер киргизилет
ИИМ Жол кыймылынын эрежелерин бузганда төлөнүүчү айыппулдарды төлөбөгөндөргө каршы күрөшүү үчүн айрым мыйзамдарга түзөтүү киргизүүнү сунуштады. Тиешелүү мыйзам долбоору нормативдик-укуктук актыларды коомдук талкууга алуу үчүн ачылган Бирдиктүү порталга жарыяланды.
Маалымдама-негиздемеге ылайык мамлекеттик органдарга айып пулдарды төлөбөгөндөрдүн транспорт каражаттарын каттоого жана кайра каттоого, аларга айдоочулук күбөлүк берүүгө, кыймылсыз мүлккө байланыштуу келишимдерди түзүүгө, ошондой эле лицензия, уруксат берүүгө тыюу салынат.
ИИМдин маалыматы боюнча 2025-жылдын 6 айында мамлекеттик органдар менен жергиликтүү өз алдынча башкаруу органдары жол кыймылынын эрежелерин бузуу боюнча 853,6 миң протокол түзүп, анын 202,5 миң сом айып пулу эмдигиче төлөнө элек. “Бул мекемелер менен жарандардын айып пулдарды төлөөдөгү ак ниетсиздигин көрсөтүп турат”,-делет маалыматта.
Ошол эле кезде Милициянын жол кайгуул кызматы бүгүн 3 сааттын ичинде 31 мыйзам бузууну каттап, айдоочуларга жалпы 465 миң сом айып пул салган.
