Мэрия жол тыгындарын азайтуу боюнча бардык сунуштарды кароого даяр
Бишкек шаарынын 2050-жылга чейинки башкы планынын жаңы долбоору боюнча өткөн брифингде Бишкек мэри Айбек Жунушалиев журналисттердин бир катар суроолоруна жооп берди.
Мэр жол тыгыны боюнча берилген суроого жооп берип, мэрия калаадагы жол тыгындарын жоюу боюнча бир нече компаниялардын сунуштарын да кароого даяр экенин билдирди.
“Биз башкы планды карап жатканда баарын комплекстүү карашыбыз керек. Эгер башкы планда жол инфтратүзүмүн жакшыртууга эле басым жасай берсек башка маселелер каралбай калат. Жүрүп-жүрүп ошол каралбай калган маселеге кайра такалабыз. Мисалы, башкы планда “15 мүнөттүк жол” деген концепцияны ишке ашырып жатабыз. Тагыраагы, келечекте ар бир шаардык өзүнө керектүү кызмат көрсөтүүчү жайларга жөө 15 мүнөттүн ичинде жеткидей шарт түзүшүбүз керек. Башкача айтканда, Бишкекке жетишсиз болуп жаткан 45 мектепти курууга жетишсек, шаардыктардын көбү мурдагыдай балдарын алыскы мектептерге ташыбай жакынкы мектерге берет. Бул да болсо жол тыгындарына таасир этет”,-дейт мэр А.Жунушалиев.
Буга улай шаар башчысы эксперттер жол тыгыны маселеси бир-эки түрдүү транспорт менен чечилбей турганын билдиргенин ортого салды. “Биз деген бир учурда бир нече транспорттук тутумдарды өнүктүрүшүбүз керек. Алардын ичинде трамвай бар. Ал автобуска караганда жүргүнчүлөрдү көбүрөөк ташыйт. Ошол себептен биз азыркы заманбап, рельстерсиз, контакттык линияларсыз жүрө турган трамвайларды киргизүүнү карап жатабыз. Ошол эле Кытай компаниялары сунуштаган монорелстүү трамвайларды деле өнүктүрсөк болот”,-деди мэр.
“Биз кытайлык компанияларга “Өзүңөрдүн концепцияңарды бергиле, башкы планга салалы. Кийин ишке ашыра турган болсоңор каршы эмеспиз” дегенбиз. Кытай компаниясы болобу, Корея компаниясы болобу, өздөрүнүн сунуштамаларын берип жатат. Эгер алар акчаларын кайра чыгара алышса иштешели деп жатабыз. Мына бүгүн эле алар Бишкектин батыш, чыгыш айланма жолдорун курууга даяр экенин билдирип жатышат”,-деп кошумчалады А.Жунушалиев.
