“Кытай–Кыргызстан–Өзбекстан” темир жолу боюнча үч тараптуу талкуу өткөрүлдү
20-ноябрда "Кытай–Кыргызстан–Өзбекстан" темир жол долбоорунун жүрүшүн талкуулоо боюнча үч өлкөнүн өкүлдөрү жолугушту. Бул тууралуу Транспорт жана коммуникациялар министрлигинин маалымат кызматынан билдиришти.
Жолугушууга Кыргызстандын Транспорт жана коммуникациялар министри Абсаттар Сыргабаев, Өзбекстан Республикасынын транспорт министри Илхом Махкамов жана Кытай тараптан атайын өкүлдөр катышты.
Иш-чарада тараптар долбоордун учурдагы абалын карап чыгышып, темир жол курулушу практикалык баскычка өткөнүн белгилешти. Министр Абсаттар Сыргабаев долбоор белгиленген мөөнөттө аякташы керектигин белгилеп, курулуш иштерин тездетүү үчүн Кыргызстан бардык зарыл жардамды көрсөтүүгө даяр экенин билдирди.
Учурда тоннелдерди казуу, убактылуу инфраструктураны куруу, уюштуруучулук жана административдик иштер жүрүп жатат.
Белгилей кетсек, "Кытай–Кыргызстан–Өзбекстан" темир жол долбоорунун ишке ашуусу Кыргызстан үчүн гана эмес, бүтүндөй регион үчүн маанилүү долбоор болуп саналат. Ал жүктөрдү ташуу аралыктарын кыскартып, транзиттик мүмкүнчүлүктү кеңейтип, жаңы жумуш орундарын түзүүгө шарт түзөт. Мындан сырткары, өлкөлөр ортосундагы экономикалык кызматташууну жаңы деңгээлге чыгарат.
