Төө-Ашууда "Келечек" туннелин куруу келишимине кол коюлду
Бүгүн, 2025-жылдын 16-июлундагы МинКабдын № 421 токтому менен Төө-Ашуу ашуусундагы “Келечек” альтернативдүү туннелин куруу боюнча мамлекеттик-жеке өнөктөштүк келишимине кол коюлду. Келишим Транспорт жана коммуникациялар министрлиги, Улуттук инвестиция агенттиги жана “Тез Жол” компаниясы баштаган консорциум тарабынан түзүлгөн.
Жаңы туннельдин узундугу 11,5 километрди түзөт жана болжол менен 2200 метр бийиктикте жайгашат. Бул туннель бүт жыл бою коопсуз жана үзгүлтүксүз транспорттук байланыштарды камсыздайт.
Долбоордун алкагында ошондой эле эки төлөм пункту, эки чакан ГЭСтин курулушу (жалпы кубаттуулугу 31,3 МВт) жана туннелди башкаруу боюнча заманбап система курулат.
Жалпы инвестициянын көлөмү 640 млн долларды түзөт жана бардык каражатты жеке тарап камсыздайт, мамлекеттик бюджеттен каражат бөлүнбөйт. Проектти ишке ашыруу жана эксплуатациялоо мөөнөтү 49 жылды түзөт.
