Бишкекте эмнеге машруттар өзгөртүлдү жана айдоочулар неге жетизсиз? Мэрия жооп берди
Бишкектеги көптөгөн автобустар маршруту өзгөрдү, айрым маршруттар таптакыр жок болгонун "Ынтымак" фракциясынын депутаты Казыбек Эргешов Бишкек шаардык кеңешинин муниципалдык менчик, жер маселелери, шаар куруу жана архитектура боюнча туруктуу комиссиясынын жыйынында билдирди.
Ал автобустардын жетишсиздигине, маршруттук өзгөртүүлөрдүн киргизилишине эмне себеп болгонуна кызыкты.
Бишкек мэриясынын Транспорт жана жол-транспорт инфраструктурасын өнүктүрүү департаментинин директору Уланбек Бейшенбаевдин айтымында, учурда борбордо 67 маршрут иштейт. Беш автопаркта 1467 автобус бар. Мындан тышкары, ЕРӨБ программасы аркылуу алынган 95 жаңы автобус Бишкекке жеткирилген, алар учурда бажыдан өткөрүлүп жатат.
Ал белгилегендей, ири сыйымдуулуктагы 11 маршрут иштеп жатат, ошондой эле "Эко жүргүнчүлөрдү ташуу" компаниясынын автобустары да кызмат көрсөтүп жатат. Ошондой эле муниципалдык ишкана административдик-аймактык реформа алкагында Бишкекке кошулган айылдарга каттаган 8 маршруттагы микроавтобустарды тейлейт. Мисалы, №200 маршрут Тоолуу Маевка айылынан каттайт. Баары кадимки режимде иштеп жатат, маалыматты "Мой город" тиркемесинен онлайн көрүүгө болот.
Буга улай ал ААР алкагында Бишкекке кошулган айрым айылдардын кээ бир көчөлөрү азырынча маршрут менен камтылбаганын, мэрия бул багытта иш жүргүзүп, узундугу 7–8 метр автобустарды сатып алуу пландалып жатканын кошумчалады.
Депутат Эргешовдун айтымында, маршрут схемалары негизинен жүргүнчү көп жерлерде жакшы иштелген, бирок оорукана, поликлиника, мектептер жайгашкан аймактар жетиштүү камтылган эмес.
