Кыргызстан менен Казакстан автомобилдерди киргизүү боюнча бир пикирге келе алган жок
ЕАЭБге мүчө өлкөлөр автоунааларды алып кирүүгө көзөмөлдү күчөтүү маселесин макулдаша албаганын "Коммерсантъ" жазды. Басылманын маалыматына караганда, 11-декабрда өткөн ЕАЭБдин өкмөттөр аралык жыйынында биримдикке мүчө мамлекеттердин өкмөт башчылары интеграцияны тереңдетүүгө байланыштуу бир катар маселелер боюнча бир пикирге келе алышкан эмес.
Айрыкча, Казакстан жарандар электрондук аукциондордон сатып алган автоунааларды алып кирүүгө көзөмөлдү күчөтүүнү сунуштаган. Бул Кыргызстан тараптан кескин каршылыкты жараткан. Маселе менен тааныш булак басылмага түшүндүргөндө, кыргыз делегациясы мындай чара биримдиктеги интеграцияны бузарын белгилеген. Талкуу эми президенттер деңгээлине өткөрүлөт.
Ошондой эле үчүнчү өлкөлөрдөн келген кымбат товарлардагы бажы наркын атайылап төмөндөтүү тобокелдигинин индикаторлорун унификациялоо боюнча доклад да кабыл алынган жок — бул боюнча да Кыргызстан каршы чыкты. Беларус премьери Александр Турчиндин айтымында, бул багыттагы иш биримдик өлкөлөрүнүн бюджеттерине кошумча 75 млн доллар бажы төлөмдөрүн жана 600 миллиондон ашык кошумча нарк салыгын алып келген.
Каршылыктарга карабастан, интеграциянын жалпы келечегин бардык тарап колдоду. КРнын өкмөт башчысы Адылбек Касымалиев жаңы технологияларга жетүү аркылуу сооданы кеңейтүү зарыл экенин белгиледи.
