Кыргызстан жана Франция транспорт кызматташтыгын күчөтөт
Бүгүн, 12-декабрда Транспорт жана коммуникациялар министринин орун басары Бекназар Базаралиев Франциянын Кыргызстандагы элчиси Николя Фай баштаган делегация менен жолугушту. Бул тууралуу Транспорт жана коммуникациялар министрлигинин маалымат кызматы билдирди.
Тараптар автомобиль жана темир жол куруу багытындагы кызматташууну талкуулап, ири инфраструктуралык долбоорлордун жүрүшү тууралуу маалымат алышты. Базаралиев министрлик мамлекеттик саясатты ишке ашырып, “Кытай–Кыргызстан–Өзбекстан” темир жолу жана Барскоон–Бедел–Учтурфан автожолунун курулушу активдүү жүрүп жатканын билдирди.
Элчи Николя Фай Кыргызстандагы экономикалык өсүш жана транспорт тармагынын өнүгүүсү Франциялык тажрыйбалуу компаниялар үчүн кызматташуу мүмкүнчүлүктөрүн кеңейтээрин белгиледи. Жолугушууда эки тараптын ортосундагы көп тараптуу кызматташтыкты өнүктүрүү жана жаңы демилгелерди колдоо макулдашылды.
