Бишкекте Чыгыш айланма жолунун курулушу башталды
Бишкек шаарында борбор калаанын эң маанилүү инфраструктуралык долбоорлорунун бири — Чыгыш айланма автомобиль жолунун курулушу башталганын муниципалитеттин басма сөз кызматы маалымдады.
Жаңы транспорттук коридор шаардын чыгыш бөлүгүндө, шаардык курулуштардан тышкары аймакта өтөт. Чыгыш айланма жолунун жалпы узундугу 16 чакырымды түзөт. Долбоордун алкагында беш ири транспорттук түйүн (айрылыш жолдор) курулат, ошондой эле Кант тараптан эстакадалык көпүрө салынат.
Чыгыш айланма автомобиль жолунун долбооруна ошондой эле ага туташкан негизги магистралдык көчөлөрдү куруу жана реконструкциялоо кирет.
Тактап айтканда:
- Лев Толстой көчөсү — Ауэзов көчөсүнөн Чыгыш айланма жолуна чейин (5,7 км);
- Ахунбаев көчөсү — Ауэзов көчөсүнөн Чыгыш айланма жолуна чейин (3 км);
- Сухэ-Батор көчөсү — Ауэзов көчөсүнөн Чыгыш айланма жолуна чейин (2 км);
- Жукеев-Пудовкин көчөсү — А. Токомбаев көчөсүнөн Иманалиев көчөсүнө чейин (2,2 км);
- Иманалиев көчөсү — Жукеев-Пудовкин көчөсүнөн 7-Апрель көчөсүнө чейин (3 км).
Чыгыш айланма жолун кошо эсептегенде, ага туташкан жолдордун жалпы курулуш узундугу 32 чакырымды түзөт.
Айбек Джунушалиевге жана башка жооптуу кызмат адамдарына Жукеев-Пудовкин көчөсүнүн А. Токомбаев көчөсүнөн Иманалиев көчөсүнө чейинки бөлүгүн куруу долбоору тааныштырылды. Бул объектте учурда 100гө жакын атайын курулуш техникасы иш алып барууда.
