Ички аба каттамдардын баалары арзандайт жана туруктуу болот
2026-жылга карата өлкө ичиндеги аймактарга болгон аба каттамдардын баалары Президент Садыр Жапаровдун тапшырмасына ылайык арзандатыларын президенттин басма сөз катчысы "Кабар" агенттигине Аскат Алагөзов билдирген.
Анын айтымында, ортодогу айырма Турукташтыруу фондунун каражаттары менен жабылып турат. Башкача айтканда, мурдагыдай болуп кайсыл бир аймакка уча турган каттамдын билеттери акыркы саатта кескин кымбаттап кетпейт.
"Бул демилге социалдык мүнөзгө ээ жана Кыргызстандын жарандарынын кызыкчылыгы үчүн гана ишке ашырылып жатат. Буга чейин ички каттамдар боюнча билеттердин баасы рыноктук принцип боюнча түзүлүп, жүктөмгө, мезгилге жана суроо-талапка жараша белгиленип келген. Мындан улам учуулар туруксуз, баасы боюнча көпчүлүк жарандар үчүн жеткиликсиз жана алыскы аймактардын жашоочулары үчүн өзгөчө оор болгон.
Бүгүн президент Садыр Жапаровдун чечими менен мамлекет бул жааттагы туруктуулукту камсыздап, чыгымдардын бир бөлүгүн өзүнө алды.Демилге аймактардын жеткиликтүүлүгүн арттырууга; ички туризмди колдоого; региондордогу чакан жана орто бизнести өнүктүрүүгө; өлкөнүн резиденттери үчүн ыңгайлуу шарттарды түзүүгө багытталган.
Нарын, Талас, Казарманга каттамдар мурда жумасына 1 жолу аткарылчу. 4-январдан баштап бул багыттар боюнча жумасына 2 жолудан каттам аткарылат", - деп жазды Алагөзов.
