Январдан тарта Ч.Айтматов проспектисинин бир бөлүгү убактылуу жабылат
1-январдан тарта Бишкек шаарында Чыңгыз Айтматов проспектисинин Семетей көчөсүнөн А.Токомбаев көчөсүнө чейинки бөлүгү убактылуу жабылат. Бул тууралуу мэриядан билдиришти.
Бул чара жөө жүргүнчүлөр үчүн жер алдындагы өтмөк жана аялдама комплекстерин куруу иштеринин башталышына байланыштуу кабыл алынууда. Тиешелүү чечим Бишкек шаарынын мэри Айбек Джунушалиевдин тапшырмасы менен кабыл алынып, майрамдык эс алуу күндөрүн эске алуу менен ишке ашырылууда.
Борбор калаанын тургундарынын жана конокторунун коопсуздугун камсыздоо максатында, курулуш мезгилинде бул жердеги жол кыймылы убактылуу чектелет. Айдоочуларга альтернативдүү жолдорду колдонуу жана жол белгилерине көңүл буруу сунушталат.
Бишкек шаарынын мэриясы бул убактылуу ыңгайсыздыкка түшүнүү менен мамиле кылууну суранат.
