"Монте-Карлонун" ордуна "Венеция"
31-декабрдын кечинде Бишкекте курулуп жаткан Old Bishkek аттуу жаңы соода комплексинин аймагын жааган жамгырдан кийин суу каптады.
Комплекс Чүй проспектисинде, Д.Шопоков жана Ж.Абдрахманов көчөлөрүнүн ортосунда курулуп, коомчулук тарабынан бир топ нааразычылыктарды жараткан. Буга чейин Old Bishkek комплексинин ээси Нариман Түлеев сын-пикирлерге жооп берип жатып, "бул жерди Монте-Карло кылам" деп билдирген.
Окуя болгон жерден тартылган видеолор социалдык тармактарда жарыяланды.
Колдонуучулар дренаждык система талаптагыдай иштебей калганын белгилеп, убада кылынган "Монте-Карлонун" ордуна шаардыктар азыр "Венецияны" көрүп жатышканын жазышууда.
