Нарын шаарында коомдук транспорт санариптештирилүүдө
Нарын шаарында коомдук транспортту санариптештирүү иштери башталды. Бул тууралуу президенттин аймактагы өкүлчүлүгү кабарлады.
Маалыматка ылайык, Бишкектеги ийгиликтүү тажрыйбанын негизинде Нарын облусунда автобустарга GPS-трекерлер орнотулуп, “Менин шаарым” тиркемеси ишке киргизилет.
Жаңы система аркылуу шаар тургундары коомдук транспорттун кыймылын онлайн режимде көзөмөлдөп, автобустардын кайсы жерде экенин, маршруттардын жүрүшүн жана келүү убактысын так билиши мүмкүн.
Мындан тышкары жакынкы мезгилде коомдук транспортто “Тулпар” мобилдик тиркемеси да киргизилет. Анын жардамы менен жүргүнчүлөр жол кирени накталай эмес, онлайн түрдө төлөй алышат.
Бул санариптештирүү долбоору шаар тургундары үчүн коомдук транспортту колдонуу ыңгайлуулугун жогорулатууга жана жол кыймылын көзөмөлдөөдө эффективдүүлүктү камсыздоого багытталган.
