Бишкектин түндүк айланма жолунун айрым тилкелери убактылуу ачылды

Кечээ Транспорт жана коммуникациялар министри Абсаттар Сыргабаев Бишкек шаарынын түндүк айланма жолунда жүрүп жаткан курулуш иштерин жеринен текшерди. Бул тууралуу ведомстводон билдиришти.

Жарандарга ыңгайлуу шарт түзүү жана жол тыгындарын азайтуу максатында Алма-Ата–Бишкек–Ташкент унаа жолунун 230–236-чакырымдар аралыгында жайгашкан эки деңгээлдүү үч жол түйүнү убактылуу пайдаланууга берилди. Асфальт төшөө иштери жаз мезгилинде улантылат.

Учурда алгачкы 6 тилкелүү трассанын курулушун жүргүзүп жаткан подряддык компания тарабынан кышкы курулуш нормалары сакталуу менен калган тилкелерде жумуштар аткарылууда.

Иш сапардын жүрүшүндө министр Абсаттар Сыргабаев курулуш иштеринин сапатына жана белгиленген графикке ылайык аткарылышына өзгөчө көңүл бурууну тапшырды.

Белгилей кетсек, Бишкек шаарынын түндүк айланма жолунун жалпы узундугу 33,4 чакырымды түзөт. 2026-жылы аталган жолдун 15 чакырымы, анын ичинде Алма-Ата–Бишкек–Ташкент жолунун 6 чакырымы жана Бишкек–Нарын–Торугарт жолунун 9,1 чакырымы реконструкцияланып бүтөт деп күтүлүүдө.