Быйыл өлкө боюнча дагы 20 миң видеокамера орнотулат
2025-жылдын ичинде коомдук коопсуздук камералары 6 миңден ашык укук бузууну аныктаганын "Биринчи радио" эфиринде ИИМдин коомдук коопсуздук кызматынын башчысынын орун басары Алмаз Батырбаев билдирди.
"Бүгүнкү күндө республика боюнча коомдук жайларда 3 миңден ашык видеокөзөмөл камерасы иштеп жатат. Ар бир аныкталган факт боюнча маалымат мыйзам чегинде чара көрүү үчүн райондук ички иштер органдарынын аймактык бөлүмдөрүнө жөнөтүлөт", — деди Алмаз Батырбаев.
Ал ошондой эле 2026-жылы "Коопсуз өлкө" долбоорунун экинчи этабынын алкагында 20 миң видеокамера орнотуу пландалып жатканын кошумчалады.
"Иш этап-этабы менен жүргүзүлөт. Адегенде кызматкерлер кылмыштар көп катталган жерлерди талдап чыгышат. Мындан тышкары, видеожабдууларды орнотуу үчүн тиешелүү инфраструктура — үзгүлтүксүз электр энергиясы, интернет байланыш линиялары жана башка шарттар талап кылынат. Камералар бир нече түргө бөлүнөт: айрымдары өз огунун айланасында 360 градуска айланып турса, башкалары туруктуу болуп, бир багытты гана көзөмөлдөйт", — деп түшүндүрдү Алмаз Батырбаев.
