Барскоон-Бедел жолуна 3 жылда 53,4 млрд сом жумшалат
2026-жылга жана 2027–2028-жылдардагы пландуу мезгилге карата республикалык бюджет жөнүндө мыйзамда мамлекеттик инвестициялар боюнча чыгашалар жана капиталдык салымдарды каржылоонун булактары (5-берене) бекитилген.
Документке ылайык, 2026-жылга капиталдык салымдар үчүн 27,68 млрд сом каралган. Анын ичинен 17,68 млрд сом Ысык-Көл облусундагы Барскоон – Бедел унаа жолун курууга багытталат.
Дагы 10 млрд сом 2026-жылга бекитилген тизмеге ылайык социалдык-экономикалык объектилерди, ичүүчү суу менен камсыз кылуу жана ирригация системаларын, унаа жолдорун, улуттук коопсуздук, коомдук тартип, куралдуу күчтөр объектилерин жана стратегиялык маанидеги объектилерди долбоорлоону аяктоого же улантууга, курууга, капиталдык оңдоого жана реконструкциялоого артыкчылык берүү менен бөлүнөт.
Каржылоонун булактарынын катарында мамлекеттик казыналык облигацияларды чыгаруудан түшкөн каражаттар да көрсөтүлгөн. Бул облигациялар коммерциялык банктардагы депозиттик эсептерге жайгаштырылат.
2027–2028-жылдарга карата капиталдык салымдардын пландалган көлөмү тиешелүүлүгүнө жараша 27,86 млрд сом жана 27,9 млрд сом деп белгиленген. Ошол эле учурда Барскоон – Бедел унаа жолун курууга 2027-жылы 17,86 млрд сом, 2028-жылы 17,9 млрд сом каралган.
Мыйзамда ошондой эле стимулдаштыруучу (үлүштүк) гранттарды каржылоо өзүнчө бекитилген. 2026, 2027 жана 2028-жылдардын ар биринде 1,5 млрд сомдон бөлүү каралып, артыкчылык республикалык бюджеттен дотация алган жергиликтүү өз алдынча башкаруу органдарына берилет.
