Бишкектеги автобус айдоочуларынын орточо маянасы 56,7 миң сом
Бишкек шаардык кеңешинин депутаты Эмир Марлисбеков 3-февралда "Эмгек" жана "Жаңы Күч" фракцияларынын биргелешкен жыйынында автобустун айдоочуларынын учурдагы айлык акысынын деңгээли жана аны эсептөө тартиби тууралуу суроо узатты.
Бишкек шаардык транспорт муниципалдык ишканасынын директору Талантбек Капаров автобустун айдоочуларынын айлык акысы KPI көрсөткүчтөрүнүн негизинде төлөнөрүн билдирди.
Анын айтымында, тарифтик ставка 102 сомду түзөт, ар бир ай үчүн өзүнчө баланс каралат. Мисалы, орточо баланс 165 саатты түзөт жана ал 102 сомдук тарифтик ставка менен эсептелет.
Мындан тышкары:
- жүргүнчүлөр агымын 90% аткарганы үчүн кошумча акы,
- каттамдардын үзгүлтүксүздүгү үчүн — 40%,
- жумуш убактысынын балансын аткарганы үчүн — 50%,
- тейлөө маданияты үчүн — 20%,
- ашыкча иштеген сааттар үчүн — 6 222 сом кошулат.
Бардык көрсөткүчтөрдү эсептегенде, автобустун айдоочуларынын орточо айлык акысы 56 миң 712 сомду түзөт.
