Бишкекте 7 миң ар кандай мамылар демонтаждалат
Транспорт жана жол-транспорттук инфраструктураны өнүктүрүү департаменти 2026-жылы Бишкек шаарында 7 миңге чейин ар кандай мамыларды демонтаждоону пландап жатканын 5-февралда Бишкек шаардык кеңешинин экономика, бюджет, финансы жана инвестициялар боюнча туруктуу комиссиясынын жыйынында департаменттин директору Уланбек Бейшенбаев билдирди.
Буга чейин депутат Эмир Марлисбеков 2026-жылга карата бюджет долбоорунда каралган 44 млн 983 миң сом өлчөмүндөгү кызматтык чыгымдар эмнелерди камтый турганына кызыккан.
Уланбек Бейшенбаевдин түшүндүрмөсүнө ылайык, "Таза асман" долбоорунун алкагында Бишкек шаарында бетон жана темирден жасалган 7 миңге чейин ар кандай мамылар бар.
"Бул мамылардын бардыгын демонтаждоону пландап жатабыз. Иштердин графиги бар", — деди ал.
Ошондой эле 2026-жылы светофорлорду орнотууга 30 млн сом каралууда. Бул каражатка шаардын 11–12 көчө кесилишине жаңы светофорлор орнотулат.
Депутат буга чейин фракция жыйынында департаменттин директору 5 светофор объектисин орнотуу планы тууралуу айтканын эске салды. Уланбек Бейшенбаев муну тастыктап, беш объект такталган светофорлор экенин билдирди. Учурда калган светофорлор боюнча МККББ менен биргеликте иш алып барылып жатканын кошумчалады.
Бишкек шаарында учурда 72 эски лампалык светофор бар. Алар этап-этабы менен модернизацияланат.
Мурда маалымдалгандай, "Таза асман – 2030" концепциясынын негизги максаты — Бишкек шаарынын көрүнүшүн бузган аба аркылуу тартылган байланыш линияларын жоюп, алардын ордуна заманбап жер астындагы инфраструктураны түзүү. Мэриянын пикиринде, бул шаардык чөйрөнү эстетикалык жактан жакшыртып, интернет кызматтарынын сапатын жана ишенимдүүлүгүн жогорулатууга, санариптештирүүгө жана шаардык инфраструктуранын туруктуу өнүгүшүнө өбөлгө түзөт.
