Бишкектин айрым көчөлөрүнө жөө адамдар башкара турган жол чырактар орнотулат
Бишкек шаардык кеңешинин депутаты Рамина Идырова 5-февралда борбор калаадагы кооптуу аймактарга жөө жүргүнчүлөр үчүн светофорлорду орнотуу маселесин көтөрдү. Экономика, бюджет, финансы жана инвестициялар боюнча комиссиянын жыйынында депутат сатып алынуучу светофорлордун саны, сметанын бар-жогу жана алар орнотулуучу жерлер тууралуу сурап, жөө жүргүнчүлөрдүн коопсуздугу өзгөчө мааниге ээ экенин белгиледи.
Транспорт жана жол-транспорттук инфраструктураны өнүктүрүү департаментинин директору Уланбек Бейшенбаев учурда комиссия Жол кайгуул кызматынын кызматкерлери менен биргеликте кооптуу участокторду текшерип жатканын билдирди. Текшерүүнүн жыйынтыгы менен кайсы кесилиштерге баскыч аркылуу иштөөчү (чакыруучу) жөө жүргүнчү светофорлорун орнотуу зарыл экени аныкталат.
Анын айтымында, мындай бир светофор 350–400 миң сом турат. 2026-жылга 5–6 локация пландалууда, ал эми акыркы санды ЖККнын жол көзөмөлү бөлүмүнүн кызматкерлеринен турган комиссия аныктайт.
Депутат үч өзгөчө кооптуу участокту атады: Фрунзе – Пархоменко, Достоевский – Фрунзе жана Фрунзе – Будённый көчөлөрүнүн кесилиштери. Фрунзе – Будённый кесилишинде мечит жайгашкандыктан, күн сайын авариялык кырдаалдар жараларын белгиледи. Анын айтымында, мечитке көп адам келгендиктен жарандар жолду белгиленбеген жерлерден кесип өтүп, жөө жүргүнчүлөр жабыркабаса да унаалардын кагылышуусуна алып келет.
